Oleh: Salam Yoga S
Kutalu geralmu Ine
Jema lén nungerné Ine le geralmu
Kutalu geralmu Ine
Sebeb beséle muyang Gayo munosah sebuten
Si muroroh serge ituyuh ni tapak kidingngé
Aku munalu geralmu Ine
Si kurasan relem wan dede
Aku munalu geralmu Ine
Kujerib segele gemasih den anutni semayangngé gere beteduh
Kutalu geralmu Ine
Sebagé sigere mampu kubeles budi
Aku munalu geralmu urum Ine
Sebagé manusie pemulo si kuberijinni
Kutalu geralmu Ine
Ketike Rasulpé mutulun munyebut geralmu
Ine ….. Ine …..Ine
Aku si munalu geralmu Ine
Ketike aku rinu denem segele harap i insya Allah-en munjadi nyata
Den aku mujadi kekanak budak wan janyun ni Illahi
Aku si munalu geralmu Ine
Sebagé aku si ilahiren bumi
Dipetik dari Buku Antologi Puisi Bahasa Gayo “Pungi den Pakanlaya”. Takengon: The Gayo Institute (TGI), 2020.
